6f. 有咩生意必賺?第一,一定係...

回覆文章
Man
文章: 4
註冊時間: 2020-08-15, 11:26

6f. 有咩生意必賺?第一,一定係...

文章 Man »

本版名為必賺企業。其實,世界上有無生意係必賺呢?文公子可以好肯定同你講,有!不過係唔係你同我有份做。

第一個必賺行業,係做庄開賭!當然,你必須有合法牌照。

點解必賺?因為中國人天性好賭,你一開檔就自然有賭客入來。當然,新冠肺炎搞到水靜鵝飛,好似澳門前幾個月咁,就係另一回事。不過,香港最大的賭場在股票市場,疫症期間成交額大增,真係此消彼長。

所謂開賭,你只要睇睇賭業股的年報,會同你講賭場點賺錢,佢地會話「賺取賭客在博彩時所作的錯誤決定」。其實,入場賭錢已經係錯誤的決定,因為賭場贏梗。

你以為賭場買大細,賠率係一賠一,好公平?但其實,大細中有圍骰通殺,買大亦可以開細,所以賭場先天贏面已經高過0.5;百家樂好公平?唔係庄就係閒,但其實以前你買庄,贏左的話賭場係要抽水的,即係話賭場先天就已經佔左你少少的便宜。就係呢少少的便宜,佢的勝出率就變成大過0.5。除非你係職業賭徒,否則正常來講,你只係得閒去玩下,但賭場日日開,舖舖開,在概率理論來講,佢係開無限舖的,只要概率大過0.5,無限大乘出來的結果,係近乎甚至等如1,即係佢贏梗。

賭場當然唔怕你贏錢,因為輸錢皆因贏錢起,而一時的輸贏,係唔會影響賭場長賭必勝的結果。

如果你唔贏過,你又點會心郁郁想再去贏?只要你試過有少少甜頭,耐唔中有比你贏一次小勝利,你更加會手痕,想試試自己今期的運氣,直到輸到你服為止。其實,電影都有教:「唔賭唔知時運到,唔滾唔知身體好。」而賭場的心態,就係如已故賭王所講:「唔怕你精,唔怕你呆,最怕係唔來。」

賭場唔怕你贏錢的,只怕你以後割禾青。因此,賭王自己都話,佢1蚊都唔會賭。

馬會又如何?馬會同麻雀館一樣,只係抽法例規定的水(提成),所以佢根本係睇住你地對賭,只要多人賭,佢就越可以坐享其成,完全無風險。有一輪,澳門賭場推廣Poker,道理亦係一樣。

開賭,唔係你同我做的,因為開外圍都犯法,而自己打下衛生麻雀,你識飛都唔會贏得幾多,你就算係雀聖 次次贏,但又有邊個會再同你賭?

你地有無人有賭場必勝心得?有的話,又不妨分享下。

除左開賭,世界上仲有好多必贏行業,下次開post再同你分享下。
版主通告:請用道理說服人。有道理,唔需要用粗口做助語詞。 8-) 8-) 8-)
本版支持理性討論,謝絕粗口,如有無理謾罵者,刪無赦! :lol: :lol: :lol:

回覆文章

回到「百家爭嗚」