6f. 必賺生意系列:量出為入,必賺

回覆文章
Man
文章: 4
註冊時間: 2020-08-15, 11:26

6f. 必賺生意系列:量出為入,必賺

文章 Man »

上次講過開賭必賺,但唔係你同我呢類普通市民有機會做。

今日同大家介紹另一個必賺行業,佢地的商業模式,即係business model好簡單:量出為入。

咩叫量出為入?量入為出就聽得多。即係搵幾多,就使幾多,唔夠使,就慳啲使。就算係先使未來錢例如簽卡,都要等如廣告話齋,還得到,先好借。

量出為入又係咩概念?就係你今個月或者今季或者今年,需要使幾多錢,就同你老闆攞幾多錢,會計叫budgeting,公共財政就係最好的例子。今年你要擺幾多錢做福利、幾多錢做建設,幾多錢做咩,幾多錢做物,然後先決定收幾多稅,或者加幾多政府收費的價,做一個收支平衡的預算,就係量出為入。

等如你阿媽每個月都要計下屋企要使幾多錢,然後同你老豆攞幾錢家用一樣,而你阿媽如果識得格價慳錢的手段,在日常開支中玩婦女界最擅長的財技「打斧頭」,就通常自己會儲到一筆私己錢。

但係市場係講供求的,定價唔會因為你要使多幾多錢,就可以話加就加的。當入不敷支時,你只能夠用執笠、借錢或者注資來回應。

量出為入?非一般行業做到吧?

其實,除左政府同阿媽之外,仲有一個行業,個business model係量出為入的!而且仲係我地平民百姓可以經營嘅。

各位觀眾,呢個行業,就係「物業管理」。

近期物管股識飛一樣,各位有私己錢的主婦都可能賺左一筆,然後轉投科技股又賺多一筆。所以對物管應該唔陌生。

物業管理,只係一個管家,大廈要使幾多錢維修,要請幾多清潔看更,完全係要由業主分擔,中間物業管理公司可能都要招標,但計完條數,就可以同業主講,今年要收幾多管理費,如果唔比,咪唔做咁多項目囉。而物業管理亦會有一個合理利潤作為管理費,所以基本上係穩賺不賠。

之前,政府推出保就業計劃,每個員工津貼一半人工,上限九千,物管公司只要有供同肯供強迫金,間間都非常肥仔,因為其實佢地一定唔會炒人,一大班夥記的人工,業主一早已經比定哂出來,而欠交管理費個戶名係會比人在電梯大堂貼堂的,業主又點夠膽唔就範?因此,政府筆津貼,就變成公司的非經常性收入,六個月人工分分鐘已經有七到八位數字,呢筆額外之財仲係免稅的。你話肥唔肥仔?

不過物業管理始終係專業,有牌考,大家如果想入行,就要先讀下有關課程了。
版主通告:請用道理說服人。有道理,唔需要用粗口做助語詞。 8-) 8-) 8-)
本版支持理性討論,謝絕粗口,如有無理謾罵者,刪無赦! :lol: :lol: :lol:

lucent
Site Admin
文章: 77
註冊時間: 2020-07-11, 15:16
點讚了: 11 次
被點讚了: 9 次

Re: 6f. 必賺生意系列:量出為入,必賺

文章 lucent »

:lol:

回覆文章

回到「百家爭嗚」