左右紅藍綠

[何濼生]

一如預料，中央政府同泛民嘅鴻溝並無因周日深圳之會有所收窄。政改獲得通過嘅機會仍然渺茫。

周日深圳之會最大嘅好處係中央政府清楚表明咗佢嘅顧慮同立場。全國人大常委會副秘書長、基本法委員會主任李飛表明：人大常委會8．31決定並無時限，往後亦無鬆動嘅空間。有泛民議員指京官語帶「威嚇」成分，旨在向泛民表明如果不支持政改，就會被打成「死硬派」對付。

中央嘅強硬立場，無疑令好多泛民朋友失望。但係呢個結果本來就可預見。2013年10月6日，我應公民黨嘅邀請，參加咗一個以「公民提名何懼之有」為題嘅研討會。我當時就提出: 須要應對中央政府嘅憂慮，我寄望喺客觀存在嘅制約下，爭取最寬鬆最低門檻嘅提名方案。我同時指出：夾硬來以抗爭手段爭取，只會換來更強硬嘅回應。可惜我嘅發言惹來一片噓聲。

而家，佔中已成過去，但抗爭依舊。我地卻更遠離低門檻嘅提名。對廣大市民，普選之日，似乎更遙遠。

有泛民朋友話：對著一個專制政權，不抗爭就不可能有民主。

我無意偏幫任何一方。但以專制政權或暴政形容中央政府，平情而論並不合適。雖然國內不少事情值得批評，但係正係呢個政權大大減低咗貧窮率、提高咗國民嘅預期壽命、又大大提升咗國民嘅個人自由。呢啲都係客觀事實。近年中央政府重致力推行司法改革、打擊貪腐舞弊，呢啲都係無庸置疑。中央政府對國民嘅訴求往往會積極回應。近年國內嘅社會保障、教育、醫療，都改善了不少。對於一個雖仍有缺陷，但大致上仍能服務國民嘅政府，以專制政權或暴政形容並不公允。國內雖然一黨獨大，只要逐步建立防止貪污濫權嘅機制，對比腐敗但行多黨制嘅國家，不但不一定遜色，仲可能有可取之處。

其實，一國兩制意味著香港人要尊重國內奉行的一黨制。參選特首嘅人當然更須要尊重國內的一黨制。此外，特首當然不宜公開批評國家的政策。有異於中央政府的意見應在內部溝通，而不宜公開對抗。

港澳辦 主任王光亞 話：屬「死硬派」嘅反對派，就算「僥倖當選」，中央也堅決不予任命。中央政府有呢啲憂慮，唔應該視為有心為難泛民。我認為泛民要重建跟中央政府嘅關係，通過政改方案係有必要的一步。